Top.Mail.Ru
ՈՒՂԻՂ ԵԹԵՐ
192 Kbps
128 Kbps
64 Kbps
48 Kbps
Arm Radio FM 107
Vem Radio FM 91.1
Im Radio FM 103.8
Արցախի հետ բարեկամության համաձայնագրերի չեղարկման պատճառը իրավական ձեւակերպումներն են
2019-06-17 18:36:36

Աննա Նազարյան
«Ռադիոլուր»

ԱԺ արտաքին հարաբերությունների հանձնաժողովի այսօրվա նիստի քննարկման առանցքում էր Ֆրանսիա-Արցախ քաղաքային խորհուրդների գործակցության համաձայնագրերն անվավեր հայտարարող ֆրանսիական դատարանի որոշումը: Պատգամավորները փորձում են հասկանալ, թե ինչու են Ֆրանսիայի դատարանները կարողացել նման որոշումներ կայացնել:

ՀՀ փոխարտգործնախարարն էլ բացատրում է, որ շարունակելու են Ֆրանսիայի հետ աշխատել ու ավելի խորացնել երկու երկրների հարաբերությունները:

Ֆրանսիայի վարչական դատարանները չեղարկել են Ֆրանսիայի եւ Արցախի քաղաքների միջեւ բարեկամության համաձայնագրերը։ «Լուսավոր Հայաստան» խմբակցության պատգամավոր Արման Բաբաջանյանը Ֆրանսիայի դատարանների այս որոշումը Հայաստանի կողմից թույլ տրված բաց է համարում, կարծում է, որ հետևողականություն դրսևորելու դեպքում նման որոշումներ չէին լինի:

Ըստ «Լուսավոր Հայաստանի» պատգամավոր Բաբաջանյանի՝ այսօր էլ  որևէ ջանք, ոչ մի միջոց չպետք է խնայել գործընթացը արագ կասեցնելու համար:

ՀՀ փոխարտգործնախարար Գրիգոր Հովհաննիսյանը հարցադրումներին ու մտահոգություններին ի պատասխան պարզաբանեց, որ հայկական դիվանագիտությունը աշխատում է էլ ավելի ամրապնդել Հայաստան-Ֆրանսիա հարաբերությունները:

Արտաքին հարաբերությունների հանձնաժողովի փոխնախագահ Հովհաննես Իգիթյանն էլ բացատրեց, որ Ֆրանսիան ունի ապակենտրոնացման ձևաչափով գործող գործընթաց, ինչը թույլ է տալիս քույր քաղաքների հետ ունենալ  համապատասխան համաձայնագրեր` այդ թվում և չճանաչված պետությունների հետ:

Պարզապես մյուս երկրներում Մինսկի խումբը չի աշխատում: Իսկ բողոքարկող կողմն օգտագործել է եզրաբանությունը, որը չի համապատասխանում Մինսկի խմբի շրջանակներում գործող տերմիններին, որտեղ տեղական իշխանությունն այլ ձեւով է ներկայացվում եւ դա օգտագործվել է զուտ իրավական տեսանկյունից:

Օրենքում մի ձև է նշված, համաձայնագրում՝ մեկ այլ: Ձևակերպումն է պատճառ դարձել, որ 12 համաձայնագրեր չեղյալ հայտարարվեն: Հովհաննես Իգիթյանը, սակայն, համոզված է, որ հարցը շուտով կշտկվի և համագործակցությունը Արցախի ու Ֆրանսիայի քույր քաղաքների միջև կշարունակվի:

Ֆրանսիայի մի քանի քաղաքներ պատրաստվում են բողոքարկել դատարանների որոշումները: Facebook-ի իր էջում Բուրգ լե Վալանսի քաղաքապետ Մարլեն Մուրիեն գրել է, որ օրինա+կան է համարում Շուշիի հետ կնքված բարեկամության պայմանագիրը և բողոքարկելու որոշումը:

Նա գրել է, որ  բազմիցս է եղել Շուշիում եւ հասկացել, թե մարդասիրության ու բարեկամության արտահայտությունները ինչպիսի հույս են արթնացնում մի բնակչության սրտում, որին թշնամական Ադրբեջանը փորձում է շնչահեղձ անել:

Ֆրանսիայի Առնուվիլի քաղաքապետ Պասկալ Դոլը ևս պատրաստվում է բողոքարկել դատարանի որոշումը: Նա նշել է, որ որոշումը, մեջբերենք, «մոլեռանդության հասնող  հետապնդում է», ինչը դժվարանում է բացատրել:

0:00
0:00

Ամենաընթերցվածը