Աննա Նազարյան
«Ռադիոլուր»

Այս տարվա հոկտեմբերի 1-ին տեղի կունենա Եվրասիական բարձրագույն տնտեսական խորհրդի նիստը՝ անդամ երկրների առաջնորդների մակարդակով և այդ ընթացքում սպասվում է նաև ՌԴ նախագահ Վլադիմիր Պուտինի այց Հայաստան, տեղեկացնում է Հայաստանում ՌԴ դեսպան Սերգեյ Կոպիրկինը:

Նա խոսել է հայ-ռուսական հարաբերությունների կարևորության մասին, անդրադարձել նաև Նախիջևանում թուրք-ադրբեջանական զորավարժությունների անցկացմանը:

Նախիջևանում մի կողմից թուրք-ադրբեջանական զորավարժություններ են, մյուս կողմից երկու երկրների պաշտպանության նախարարների հանդիպում: Ադրբեջանի պաշտպանության նախարարներ Զաքիր Հասանովն իր թուրք պաշտոնակցի՝ Հուլուսի Աքարի հետ հանդիպման ժամանակ հստակեցրել է, որ Բաքուն կընդլայնի ռազմատեխնիկական համագործակցությունն Անկարայի հետ՝ երկրի ռազմական հզորությունն ամրապնդելու նպատակով:

Նրա խոսքով՝ Թուրքիայի հետ համագործակցությունը «տարածաշրջանում կայունության ապահովման գլխավոր գործոնն է»:

Նման հայտարարություններ հնչում են «Անխախտ եղբայրություն-2019» խորագրով թուրք-ադրբեջանական զորավարժությունների ժամանակահատվածի ընթացքում:

Նախիջևանում ընթացող ադրբեջանա-թուրքական զորավարժությունները, սակայն, ՀՀ-ում ՌԴ դեսպանատան ռազմական կցորդ Անդրեյ Գրիշուկի կարծիքով վտանգ չեն ներկայացնում:

Դրանք, ռազմական կցորդի խոսքով, պլանային զորավարժություններ են, որոնք հայտարարված նպատակների և խնդիրների համապատասխան են անցկացվում: Հայաստանում ՌԴ դեսպանատունն ու 102-րդ ռազմաբազան հետևում են դրանց՝ վստահեցրել է:

Ադրբեջանագետ Տաթև Հայրապետյանը նույնպես վստահ է, բայց վստահ հայկական ուժերի մարտունակության վրա:

Արցախյան գործընթացին անդրադառնալով՝ Հայաստանում ՌԴ դեսպան Սերգեյ Կոպիրկինը հստակեցրել է, որ Ռուսաստանը գործում է ԵԱՀԿ ՄԽ համանախագահության ներքո, և լարվածության աճ թուլ չտալու հարցում իրենց դիրքորոշումն անփոփոխ է, այդ նպատակով արվում են հնարավոր բոլոր քայլերը՝ ասում է:

«Իհարկե, Ռուսաստանը կարևոր դերակատարում ունի  ԼՂ հիմնախնդրի կարգավորման գործընթացում՝ այդ թվում՝ հիմնվելով Հայաստանի և Ադրբեջանի հետ ունեցած հարաբերությունների վրա, բայց չեմ կարծում, որ ամեն ինչ կախված է նրանից: Մենք կողմ ենք, որ հիմնախնդիրը լուծվի խաղաղ, բանակցային ճանապարհով, բայց  պարզ է, որ հարցի վերջնական լուծման որոշումը պետք է լինի հակամարտող կողմերինը: Այստեղ ՌԴ դերին պետք է բալանսավորված մոտենալ, այն անկասկած էական է ու ակտիվ, բայց  չի կարող փոխարինել կողմերի  դիրքորոշմանը»:

Ճիշտ չէ ասել, թե ամեն ինչ Ռուսաստանից է կախված՝ պարզաբանեց դեսպան Կոպիրկինը:

Իսկ Վեննայի ու Սանկտ Պետերբուրգի պայմանավորվածությունները, որ ուղղված են վերահսկողության մեխանիզմների ներդրմանը սահմանագոտում, ակտիվորեն քննարկվում են, դեսպանի խոսքով, կարգավորման գործընթացում այդ թվում ԵԱՀԿ ՄԽ-ի շրջանակներում:

Դեսպան Կոպիրկինն անկեղծ խոստովանեց, որ չի ցանկանում խորասուզվել այդ հարցի մեջ, քանի որ քննարկումներից տեղեկացված չէ:

Փոխարենը նա սիրով խոսում էր հայ-ռուսական ջերմ հարաբերությունների մասին, ինչը ադրբեջանագետ Տաթև Հայրապետյանի կարծիքով` գուցե ուղղված է Նախիջևանից թուրք-ադրբեջանական «Անխախտ եղբայրություն 2019-ին»  հնչած ձևակերպումների դեմ: