Լուսինե Վասիլյան
«Ռադիոլուր»

Աբովյանի թեժ ընտրություններից հետո՝  թեժ քննարկումներ արդյունքների շուրջ.  ո՞վ է  հաղթել  և  ո՞վ է պարտվել ընտրություններում, հեղափոխությունը Աբովյան հասե՞լ է, թե՞ ոչ: Այս հարցերին ի պատասխան քաղաքական դաշտում այսօր տարբեր գնահատականներ են հնչել:

«Դուք պատկերացնում եք, եթե   ես մասնակցեի ընտրություններին   ինչ  կլիներ..». ԲՀԿ առաջնորդը համոզված է, որ եթե մասնակցեր  քարոզարշավին,  Աբովյանի քաղաքապետի ընտրության արդյունքներն էլ ավելի տպավորիչ կլինեին: Իսկ  չի մասնակցել, քանի որ դրա անհրաժեշտությունը չի տեսել:

«Կարիքը չկար, որ ես գնայի աջակցեի, ինքն իր աշխատանքով ապացուցել է, որ արժանի է: Եթե կարիք լիներ , կգնայի»:

Գագիկ Ծառուկյանը չի կիսում Կոտայքի մարզպետի այն գնահատականը , թե հեղափոխությունը Աբովյան չի հասել, ավելին ՝ հաղթել է նախկին համակարգը:  ԲՀԿ առաջնորդի  համար ավելի  նախընտրել է վարչապետի գնահատականը. « Վարչապետի ասածն ինչի՞ չեք ասում ու մարզպետինն եք ասում»:

Աբովյանում տեղի են ունեցել ընտրություններ և հաղթել է ժողովրդավարությունը՝ այսօր լրագրողների հետ զրույցում ասել է վարչապետ Նիկոլ Փաշինյանը:  Անդրադարձել է նաև  հարցին, թե ինչով է պայմանավորված ՔՊ կուսակցության թեկնածուի պարտությունը:

«Մենք հեղափոխությունը հենց դրա համար էլ արել ենք, որ տեղ-տեղ իշխանական կուսակցության թեկնածուները հաղթեն, տեղ-տեղ՝ պարտվեն»:

Փաշինյանի խոսքով՝ հենց այդպես է կոտրվում քաղաքական մենաշնորհը, որի դեմ երկար տարիներ պայքարել են  ընդդիմադիր քաղաքական ուժերը:

« Այս ընտրություններով Հայաստանը եւս մեկ անգամ արձանագրեց, որ ժողովրդավարական երկիր է և որ հաստատված է ժողովրդի իշխանություն»:

Վարչապետն անդրադարձավ նաև հետընտրական  քննարկումների հիմնական հարցերից  մեկին՝  արդյոք իշխող ուժի թեկնածուի պարտությունը վարկանիշի անկման ցուցիչ է:

«Տեսեք, օրինակ՝ ուղիղ 1 տարի առաջ, հեղափոխությունից 2 ամիս հետո, մեր թեկնածուն պարտվեց Կապանի քաղաքապետի ընտրություններում, ճի՞շտ է: Դրանից հետո տեղի ունեցան ազատ, արդար, թափանցիկ ընտրություններ եւ «Իմ քայլը» դաշինքը 70 տոկոս ձայն հավաքեց Սյունիքի մարզում: Եկեք այսօրվա իրողությունները հին արշինով չչափենք, երբ ամեն ինչ արվում էր, որ սկսած ժեկի պետի թեկնածուից մինչեւ որեւէ թեկնածու իշխանության ներկայացուցիչը հաղթի»:

Քաղաքային  ընտրությունների արդյունքներով իշխանությունների վարկանիշը պայմանավորելուն դեմ է «Լուսավոր Հայաստան» խմբակցության ղեկավարը: Էդմոն Մարուքյանը նույնպես կարծում է, որ մեկ տարի առաջ Կապանի ընտրությունների օրինակը ցույց տվեց, որ իշխանության վարկանիշը համայնքային ընտրության հետ ուղիղ կապ չունի:

Փոխարենը Մարուքյանը չի հասկանում համայնքային ընտրությունները Ավարայրի ճակատամարտի վերածելու մոտեցումը:  Կարծում է, որ Աբովյանի ընտրությունների ընթացքն  անտեղի լարված էր , հետո էլ անտեղի մեծ էին  հիասթափությունն ու ոգևորությունը:

Շատ ավելի արմատական գնահատական է տալիս ընտրություններին ՝ Կոտայքի մարզպետի ներգրավվածությանը:

«Մարզպետն իր պահվածքով փչացրեց ընտրությունները: Երևի լավ կանի հրաժարական տա, բայց իրենց թիմի որոշելիքն է»:

Հարցը նույնքան արմատական չի դիտարկում ԲՀԿ առաջնորդը: Գագիկ Ծառուկյանը հրաժարականի  անհրաժեշտություն չի տեսնում:  Նիկոլ Փաշինյանն էլ կարծում է, որ մարզպետի հայտարարություններն այլ կոնտեքստում են արվել:

Կոտայքի մարզպետ Ռոմանոս Պետրոսյանը կարծիք է հայտնել, որ Աբովյանի քաղաքացին երեկվա ընտրություններին պարտվել է։